ரஜினிகாந்த் நடிப்பில் உருவான “தர்பார்” படத்தின் புரமோ பாடலுக்கும் இவர் தான் ஒளிப்பதிவு செய்துள்ளார். இரண்டு பொம்மைகளை மட்டும் வைத்து கொண்டு, கோவிட் பொதுமுடக்கத்தில் தன்னை நோய் தாக்கிய நிலையிலும், வீட்டுக்குள் தனியாளாக இருந்து ஒரு அழகான வீடியோ பாடலை உருவாக்கியுள்ளார். ஒளிப்பதிவாளர் சேவியர் எட்வர்ட்ஸ். “Thousand Kisses” எனும் இப்பாடல் உருவான விதம் குறித்து ஒளிப்பதிவாளர் சேவியர் எட்வர்ட்ஸ் கூறியதாவது.
ஒரு படத்தின் படப்பிடிப்பிற்காக மலேசியா கிளம்பிக்கொண்டிருந்தேன், அப்போது தான்
பொது முடக்கம் அறிவிக்கப்பட்டது. அடுத்த சில நாட்களில் எனக்கு கோவிட் – 19 உறுதியானது. மருத்துவ சிகிச்சை பெற்று வீட்டுக்கு வந்த பிறகு என்னை தனிமைபடுத்தி கொள்ள வேண்டியிருந்தது. தனிமை கொடியதாக இருந்தது. தனிமையை போக்க ஏதாவது செய்ய நினைத்தேன் அப்போதுதான் எனக்கு இந்த ஐடியா தோன்றியது. முதலில் வெறும் வீடியோவை தான் படம்பிடிக்க ஆரம்பித்தேன். பின்னர் என்னிடமிருந்த இரண்டு பொம்மைகள் மட்டும் வைத்து கொண்டு, ஒரு வீடியோவை படம்பிடிக்க துவங்கினேன். மனைவியின் கண்டிப்பால் வீட்டை விட்டு வெளியே செல்லவில்லை. வீட்டுக்குள்ளாகவே பல பின்னணிகளை உருவாக்கி படம் பிடிக்க துவங்கினேன். பின்னர் எனது கிரியேட்டிவ் புரடியூசர் தீபன் M, கலரிஸ்ட் நந்தார், எடிட்டர் PK ஆகியோருடன் உரையாடினேன். அவர்களது அறிவுரைகள் பேருதவியாக இருந்தது. என் மனைவியின் மொபைலில் தான் இந்த வீடியோவை படம்பிடித்தேன். அதில் குளோசப் அதிகம் செல்ல முடியாது. ஒளியமைப்பை முழுக்க நானே செய்ய வேண்டியிருந்தது. வீட்டில் இருந்த பொருட்களை பயன்படுத்தி பல பின்னணிகளை தனியாளாக உருவாக்க வேண்டியிருந்தது. மொட்டைமாடி, குளியலறை ஷவர் என பல இடங்களில் புதுமையான பின்னணியை உருவாக்கி படம்பிடித்தேன். தீபாவளி நாளில் பட்டாசுகளின் பின்னணியிலும் வீடியோ எடுத்துள்ளேன். இவ்வீடியோவிற்காக இசையமைப்பாளர் சந்தோஷ் தயாநிதியை அணுகினேன். வீடியோ பார்த்த அவர் கொரியன் பாப் பாடல் உள்ளது என பாராட்டினார். அடுத்த 24 மணி நேரத்தில் முதல் பிரதியாக ஒரு இசையை தந்தார். பின்னர் ஒரு மாதத்தில் முழுப்பாடலும் உருவாகி விட்டது. பாடலை பார்த்து விட்டு என்னுடைய குரு ரவி K சந்திரன் அவர்கள், விஜய் மில்டன், GK விஷ்ணு, தினேஷ் கிருஷ்ணன் என பலரும் வியந்து பாராட்டினார்கள். தற்போது ரசிகர்களும் பாராட்டி வருகிறார்கள். பாடலுக்காக உழைத்த கடினமான தருணங்களை இந்த பாராட்டுக்கள் போக்கிவிட்டது. அடுத்த பயணத்திற்கும் பெரும் ஊக்கமாக அமைந்திருக்கிறது.
இசையமைப்பாளர் சந்தோஷ் தயாநிதி கூறியதாவது. முதன் முதலாக ஒளிப்பதிவாளர் டீமல் சேவியர் எட்வர்ட்ஸ் இந்த வீடியோவுடன் என்னை அணுகிய போது பிரமித்து போனேன். எப்படி இவரால் இப்படி ஒரு அற்புதத்தை தனியாக செய்ய முடிந்தது என ஆச்சர்யமாக இருந்தது. உலகம் முழுதும் மனிதர்கள் இல்லாத வீடியோ பாடல்களில் பல முயற்சிகள் நடந்திருக்கிறது ஆனால் இங்கே அது மாதிரி நிகழ்வுகள் எதுவும் பெரிதாக நிகழ்ந்ததில்லை. ஒரு கொரியன் பாப் பாடலை பார்க்கும் அனுபவம் இந்த வீடியோவில் இருந்தது. அற்புதமான இசையை உருவாக்கும் தூண்டலை எனக்கு தந்தது. அவருடன் கலந்துரையாடி அடுத்த 24 மணி நேரத்தில் ஒரு பாடலில் முதல்பிரதி இசையை உருவாக்கினோம். ஒரு மாதத்தில் பாடலின் முழு வடிவமும் அழகாக உருவாகி வந்தது. “Thousand Kisses” எனும் இந்த அற்புதமான ஆல்பத்தில் எனது பங்கும் இருப்பது பெரும் மகிழ்சையை தந்துள்ளது. டீமல் சேவியர் எட்வர்ட்ஸ் பிரபல ஒளிப்பதிவாளர் ரவி K சந்திரன் அவர்களிடம் உதவியாளராக பணியாற்றியவர். தமிழில் “ஜீலை காற்றில்” படத்திற்கு ஒளிப்பதிவு செய்துள்ளார். சூப்பர் ஸ்டார் ரஜினிகாந்த் நடிப்பில் உருவான “தர்பார்” படத்தின் புரமோ பாடலுக்கும் இவர் தான் ஒளிப்பதிவு செய்துள்ளார். மக்கள் தொடர்பு: டி.ஒன்.
