இரண்டு மிகப்பெரும் பெயர்கள் ஒரு திரைப்படத்தில் இணையும் போது ரசிகர்களிடம் அப்படத்திற்கு தானாகவே ஒரு பெரும் எதிர்பார்ப்பு ஏற்பட்டுவிடுகிறது. அந்த வகையில் சமீபத்தில் தொடர்ந்து தன் நடிப்புத்திறமையால் அனைவரையும் கவர்ந்து வரும் ஐஷ்வர்யா ராஜேஷ் முன்ணனி பாத்திரத்தில் நடிக்க, ஸ்டோன் பெஞ்ச் ஃப்லிம்ஸ் மற்றும் பேஷன் ஸ்டுடியோஸ் (Stone Bench Films and Passion Studios) தயாரிக்கும் “பூமிகா” படத்தின் டைட்டில் லுக் இணைய ரசிகர்களிடம் பெரும் பாராட்டுக்களை குவித்தது. தற்போது தமிழ் சினிமாவின் நட்சத்திர நடிகரான ஜெயம் ரவி வெளியிட்டிருக்கும் “பூமிகா” படத்தின் முதற்ப்பார்வை விளம்பர பதாகை பெரும் அர்த்தங்கள் கொண்டதாக, அனைவரையும் கவர்ந்திழுத்துள்ளது.
இயக்குநர் ரதீந்திரன் R பிரசாத் இது குறித்து கூறியதாவது: எங்களின் படக்குழு சார்பாக, மிகுந்த எளிமையுடன் படத்தின் முதற்ப்பார்வை விளம்பர பதாகையை வெளியிட்டு தந்தமைக்கு நடிகர் ஜெயம் ரவிக்கு நன்றியை தெரிவித்து கொள்கிறேன். முதலில் இப்படத்தின் முதற்ப்பார்வை விளம்பர பதாகையை வெளியிட திட்டமிட்டபோது நடிப்பு திறமை மிக்க ஆளுமை வெளியிட்டால் நன்றாக இருக்கும் என்று கருதினோம். அந்த வகையில் நடிகர் ஜெயம் ரவி அவர்களை அணுகியபோது, எந்தவித தயக்கமுமில்லாமல் உடனடியாக ஒத்துக்கொண்டு, எங்கள் படத்தின் முதற்ப்பார்வை விளம்பர பதாகையை வெளியிட்டு தந்தார்.
மேலும் படம் குறித்து கூறும் போது, “பூமிகா” திரைப்படம் ஒரு ஆழமான உணர்வுகளுடன் கூடிய அதிர்வூட்டும் படமாக, பல எதிர்பாரா திருப்பங்கள் கொண்டதாக இருக்கும். தனிப்பட்ட வகையில் ஐஷ்வர்யா ராஜேஷ் உடைய அசரவைக்கும் நடிப்பு எனக்கு பெரும் திருப்தியை அளித்தது. அவர் இப்படத்தின் ஆரம்பகட்டத்தில் இருந்தே, மிகுந்த உற்சாகமுடன், கடுமையான ஈடுபாட்டுடன் இப்படத்தில் பங்கேற்றார். நீலகிரியில் படப்படிப்பு நடைபெற்றபோது, பலவிதமான பருவ நிலை மாறுபாடுகளால் படக்குழு மொத்தமுமே கடும் இன்னல்களுக்கு உள்ளானது. ஆனால் அப்போதும் நடிகை ஐஷ்வர்யா ராஜேஷ் கடுமையான ஈடுபாட்டுடனும், அர்ப்பணிப்புடனும் ஒவ்வொரு படபிடிப்பில் அற்புதமான நடிப்பை வழங்கினார். ஸ்டோன் பெஞ்ச் ஃப்லிம்ஸ் நிறுவனம் தமிழ் சினிமாவில், தொடர்ந்து தரமான படங்களை தந்து, தனக்கென தனி முத்திரையை பெற்றுள்ளது. அவர்களுடன் இணைந்து பணியாற்றும் வாய்ப்பு இப்படத்தில் எனக்கு கிடைத்திருப்பது பெரும் மகிழ்ச்சி. நாங்கள் ஒட்டுமொத்த குழுவாக கடுமையான உழைப்பில் மிகச்சிறந்த படைப்பாக இப்படத்தை தருவோம். கண்டிப்பாக இத்தயாரிப்பு நிறுவனத்தின் தரமான படமெனும் முத்திரையை இப்படம் பெறும்.
இயக்குநர் ரதீந்திரன் R பிரசாத் ரிலீஸாகவுள்ள “இது வேதாளம் சொல்லும் கதை” படம் மூலம் திரை கலைஞர்களிடம் பெரும் பாராட்டை பெற்றிருக்கிறார். பல பிரபல திரைப்படங்களில் ரசிகர்களின் கவனம் குவித்த பாவெல் நவகீதன் இப்படத்தில் ஒரு முக்கிய கதாப்பாத்திரத்தில் நடிக்கிறார் மேலும் தமிழின் திறமைமிகுந்த பல புதுமுகங்கள் இப்படத்தில் இணைந்துள்ளார்கள்.
