சென்னை பெருநகர் முழுவதும் சாலை பாதுகாப்பு விழிப்புணர்வு மாதம் கடைபிடிக்கப்படுகிறது. சென்னை பெருநகர காவல் ஆணையாளர் திரு.மகேஷ்குமார் அகர்வால், உத்தரவின் பேரில், போக்குவரத்து கூடுதல் ஆணையாளர் முனைவர் N.கண்ணன் ஆலோசனையின் பேரில் சென்னை போக்குவரத்துக் காவல் சார்பில் பொதுமக்கள் மற்றும் வாகன ஓட்டிகளுக்கு சாலை பாதுகாப்பு குறித்த பல்வேறு விழிப்புணர்வு முகாம்கள் மற்றும் விழிப்புணர்வு நிகழ்ச்சிகள் நடத்தப்பட்டு வருகிறது, இம்முகாமில் பொதுமக்கள் வாகன ஓட்டிகள் மற்றும் மாணவ, மாணவி யரிடம் சாலை விதிகளை கடைபிடிப்பதன் அவசியம் குறித்து எடுத்துரைக்கப்பட்டு, பின்னர் அவர்களிடம் சாலை விதிகள் பற்றிய வாசகங்கள் அடங்கிய துண்டு பிரசுரங்களும் விநியோகிக்கப்பட்டு வருகிறது.
இதன் தொடர்ச்சியாக சென்னை பல்கலைக்கழக நாட்டுநலப்பணித் திட்ட மாணவர்கள் மற்றும் சென்னை பெருநகர காவல் துறை இணைந்து 06.02.2021 அன்று காலை 8.00 மணியளவில் பெசன்ட் நகர், எலியட்ஸ் கடற்கரை சாலையில் நடத்திய சாலை பாதுகாப்பு இருசக்கர வாகன விழிப்புணர்வு பேரணி மற்றும் விழிப்புணர்வு நடை பிரச்சார அணிவகுப்பை சென்னை பெருநகர காவல் ஆணையாளர் மகேஷ்குமார் அகர்வால் மற்றும் சென்னை பல்கலைக்கழக துணைவேந்தர் S.கௌரி, ஆகியோர் துவக்கி வைத்து சிறப்புரையாற்றினார்கள். இந்நிகழ்ச்சியில் சென்னை பெருநகர போக்குவரத்து கூடுதல் ஆணையாளர் முனைவர் N.கண்ணன், போக்கு வரத்து இணை ஆணையாளர்கள் லட்சுமி (தெற்கு), பாண்டியன், (வடக்கு) NSS Regional Director முனைவர் சி.சாமுவேல் செல்லையா, சென்னை பல்கலைக்கழக NSS Co-ordinator பேராசிரியை வனிதா அகர்வால் மற்றும் சென்னையில் உள்ள பல்வேறு கல்லூரிகளைச் சேர்ந்த நாட்டு நலப்பணி திட்ட அதிகாரிகள், மாணவ, மாணவிகள் கலந்து கொண்டனர்.
இதனைத் தொடர்ந்து சென்னை பெருநகர காவல் ஆணையாளர் அலுவலக வளாகத்தில் உள்ள கலந்தாய்வு கூடத்தில், சென்னை பல்கலைக்கழக நாட்டு நலப்பணித்திட்ட ஒருங்கிணைப்பாளர் பேராசிரியை வனிதா அகர்வால் முன்னிலையில் நடந்த பரிசளிப்பு விழாவில் சென்னை பெருநகர காவல் ஆணையாளர் மகேஷ்குமார் நாட்டு நலப் பணித்திட்ட மாணவ மாணவிகள் பங்கு கொண்ட போட்டிகளில், போக்குவரத்து விழிப்புணர்வு தொடர்பாக சிறந்த விழிப்புணர்வு குறும்படம் தயாரித்த மகாலட்சுமி மகளிர் கல்லூரி மாணவி ஜெ.திவ்யாவிற்கு முதல் பரிசும், குருநானக் கல்லூரி மாணவி எம்.பெருமாள் தேவிக்கும் இரண்டாம் பரிசு, போக்குவரத்து விழிப்புணர்வு தொடர்பாக சிறந்த விழிப்புணர்வு வாசகம் உருவாக்கிய ஶ்ரீ முத்துகுமரசாமி கல்லூரி மாணவர் திரு.G.நிர்மலுக்கு முதல் பரிசும், சென்னை பல்கலைக்கழக மாணவி பவதாரணிக்கு இரண்டாம் பரிசும், போட்டிகளில் பங்கு பெற்ற மாணவ மாணவிகளுக்கு சான்றிதழ்களும் வழங்கி, குழு புகைப்படம் எடுத்தும் பாராட்டி வாழ்த்தினார். இந்நிகழ்ச்சியில் போக்குவரத்து கூடுதல் ஆணையாளர், இணை ஆணையாளர்கள் மற்றும் மாணவ மாணவிகள் கலந்து கொண்டனர்.
