சேலைகட்டும் வழக்கமெலாம் *இந்தி யப்பெண்*
*சிருங்காரத் திற்கல்ல !* இதுதெ ரிந்தும்
மாலைக்கண் கொண்டவர்கள் இப்ப டித்தான்
மனம்குறுகி நினைக்கின்றார் போலும்! சேச்செ…
சேலைகட்டல் இந்தியர்க்கே பண்பா டாகும் !
சேதியிதைத் தெரியாமல் புரியா மல்தான்
“சேலைகட்டக் கூடாதே” என்று புத்தி
தெளிவின்றி ஒருவரின்று சொல்லி யுள்ளார் !
இந்தியர்தம் மாணவிகள் சுதந்தி ரத்தின்
இனியதொரு நாளன்று சேலை கட்டி
வந்திருக்க லாகாதே என்றே கூறி
வருத்தத்தை இந்தியமா ணவிக்கே தந்து
நொந்துவிடச் செய்திருக்கும் அந்தப் பள்ளி
ஒழுங்குநட வடிக்கையதன் குழுத்த லைவர்
எந்தவொரு சட்டத்தின் கீழ்சொன் னாரோ ?
யாரறிவார் ? அஃதவர்க்கே வெளிச்சம் ஆகும் !?
இப்போது நடக்கின்ற ஆட்சி என்ன ?
இனவாத , மதவாத ஆட்சி அல்ல ;
எப்போதும் நாட்டுமக்கள் ஒற்று மையாய்
இருந்திடவே வேண்டுமென வலியு றுத்தித்
தப்பேதும் அதில்நடக்கக் கூடடா தென்று
சாற்றுகிற *ஒற்றுமையின் ஆட்சி* தானே !
எப்படித்தான் இதுதெரிந்தும் ஒற்று மையை
இழிவுசெய்வோர் பள்ளியிலே இருக்கின் றாரோ ?
சீனயின மாணவர்கள் *அந்நி கழ்வில்*
*சியாங்சாம்,ஹன் ஃபூ* ஆடை அணியும் போது
சீனரைப்போல் இந்தியப்பெண் அந்நி கழ்வில்
*சேலைகட்டக் கூடாதே* என்று சொல்லி
ஆனமட்டும் இந்தியரை நோக வைக்கும்
அடாதசெயல் என்பதையே அறியா மூடர் ;
ஊனமுற்ற அறிவுள்ளோர் என்று கூற
உதடசையும் என்றாலும் மெளனம் காக்கும் !
*பாதாசன்*
