இந்தியரின் மேம்பாட்டுத் திட்டத்தின் கீழாய்
இருக்கின்ற *தொழில்முனைவர்* நிதிக்கான தொகையை
முந்தியதை விடவுமின்னும் அதிகரிக்கு மாறு
முறையிட்டே *துணையமைச்சர்* *ரமணனுமே*, அரசைச்
சிந்திக்கக் கேட்டுள்ளார் ! அவர்முயற்சி வெல்க !
சீராகத் தொழில்முனைவர் முயற்சியெலாம் முடிய
வந்ததொகை குறைவென்றால் அவர்களென்ன செய்வர் ?
வழிகாட்ட அவர்விடுத்த கோரிக்கை சரியே !
கோரிக்கை சரியென்ற போதினிலும் அந்தக்
கூடுதலாய் வரும்நிதியும் உரியவர்க்கே சேர
யாரிதற்குப் பொறுப்பேற்பார் என்பதுதான் ஐயம் ?
இதுவரைக்கும் *தெக்குன்* எனும் திட்டத்தின் நிதியும்
நேரியதோர் முறையினிலே சேரவில்லை என்னும்
நினைவினிலே இருந்தின்னும் இந்தியருள் பல்லோர்
வீரியமாய் மீளவில்லை ! இதைநினைவில் வைத்து
வினையாற்றத் *தெக்குன்* முற் பட்டாலே போதும் !
தெக்குனிலே பணம்பெற்ற தொழில்முனைவர் நன்றாய்ச்
செயல்பட்டே தம்தொழிலில் முன்னேறி னாரா ;
சிக்கல்களுக்(கு) உடனடியாய் நல்லபல தீர்வைத்
தெளிவாகக் கண்டுளரா என்பதையும் நன்கு
தெக்குன்சார் அதிகாரி தெரிந்திட்டால் தானே
திட்டமதால் இந்தியர்கள் பெற்றபயன் யாவும்
தக்கபடி அறியவரும் ; அறிந்தபினே யாரும்
தெக்குனையே தவறுசொல்ல வாய்ப்பின்றிப் போகும் !
அண்மையிலே பேர்,*ரமணா* தமிழ்ப்படத்தைப் பார்த்த
அந்தநினை வோடுடனே நம் *ரமணா* செயலும்
கண்வழியாய்க் கருத்துக்குள் நுழைந்திட்ட போது
கணப்பொழுதில் ஓரெண்ணம் தோன்றிட்டே மனத்தில் !
திண்மையுடன் சமுதாய நலனுக்காய் அந்தத்
திரைபடத்து நாயகனாம் ரமணாவைப் போன்று
கண்ணெதிரே தெரியும்நம் *ரமணா* வின் செயலைக்
கண்டால்நம் இந்தியர்கள் பொருள்வளமும் வெல்லும் !
*பாதாசன்*
