அகிலமெலாம் ஏற்கெனவே பரவி யுள்ள
*அருமைச்செம் மொழி* தமிழைக் கல்வி மூலம்
அகிலாக மணப்பதற்கு வழியைத் தேடும்
அனைத்துலகத் *தமிழாசான் மாநா டொன்று*
இகத்தினிலே உள்ளவொரு *கனடா* நாட்டில்
ஈர்ப்புடனே *பதினைந்தாம்* தடவை யாக
மிகச்சிறப்பாய் நடைபெறவே இருப்ப தாக
விருப்பமுறு செய்தியைநா ளிதழில் கண்டோம் !
*தகவல்யுகக் கணினிவழித் தொழில்நுட் பத்தால்*
தமிழைவளர்க் கின்றவகை அனைத்தும் ஆய்ந்தே
தகவுடனே உலகமெலாம் *தமிழ்சார் கல்வித்*
*தரத்தினையே* உயர்த்துகிற நோக்கம் கொண்ட
அகவுணர்வில் தமிழாசி ரியர்மா நாட்டை
அருமையுடன் பெருமையுடன் *நடத்து வோரே*,
*நகம்சதையின்* உறவாகத் தமிழும் அஃதின்
நலம்பேணும் தமிழர்களும் உளரா சொல்க !
தமிழாலே *பிழைக்கின்ற* தமிழா சானுள்
சரிபாதிப் பேர்களுமே *தம்பிள் ளையைத்* *
தமிழ்ப்பள்ளிக்(கு) அனுப்புவதே இல்லை ; ஆனால்,
தமிழ்வளர்க்க வாழ்நாளை ஈகம் செய்யும்
தமிழர்களே நாங்களென அவர்கள் சொல்வர் !
தமிழாசி ரியர்கள்மா நாட்டைக் கூட்டும்
தமிழர்களே, *தமிழாசி ரியர்தம் பிள்ளை*
தமிழ்ப்பள்ளி செல்லவழி யைக் *காண் பீரே !*
தமிழ்படிக்கப் பிள்ளைகளே இல்லை யாயின்
தமிழாசி ரியர்க்கிங்கே *உண்டா வேலை ?*
தமிழ்ப்பள்ளி களுக்குத்தான் *என்ன தேவை ?*
தமிழ்க்கல்விக் கென்று *மா நாடா வேண்டும் ?*
தமிழர்களின் தலைவர்பலர் பிள்ளை யுந்தான்
தமிழ்ப்பள்ளி செல்வதில்லை என்னும் போது
தமிழ்காத்தல் தங்கள்பணி என்றே கூறும்
தமிழர்களால்… மாநாட்டால்…? *என்ன சொல்ல…!*
*பாதாசன்*
