பன்னாட்டுத் தாய்மொழிநாள் என்றே *ஐ . நா*
பாரறியப் பரந்துரையைச் செய்த நன்னாள் !
என்னாட்டில் எந்தாயின் தமிழை நாளும்
எழுச்சிபெறச் செய்முயற்சி அனைத்தும் இன்றே
எந்நாட்டி லும்காணோம் ! என்றா லும்தான்
இன்றமிழ்த்தாய் மொழிநாளை மகிழ்ச்சி யோடு
நன்றாகக் கொண்டாடு கின்றோம் நாங்கள்
ஞாலத்துத் தமிழுறவுக் குழுமத் தோடு !
தாய்மொழிநாள் கொண்டாட்டம் ஓர்நாள் தானா ?
தாய்மொழியை நினைக்கவொரு நாளா போதும் ?
தாய்மொழியும் நம்குருதி நரம்பி லெல்லாம்
தாய்ப்பாலாய் ஓடுகிற போது நாளும்
தாய்த்தமிழை நொடிக்குநொடி நினைக்கா தோரைத்
தமிழரெனச் சொல்வதிலே பொருளே இல்லை !
வாய்மொழியாய்க் கூட ,தமிழ் பேசு தற்கும்
வக்கில்லார் எவ்வகையில் தமிழர் ? சொல்க !
*உலகமொழி , நாட்டுமொழி* மட்டு மன்றி
*ஊர்மொழியாய் வீட்டுமொழி யாய்* நம் நெஞ்சுள்
உலவுமொழி யாய்த் *தமிழும்* இருந்தால் தானே
உலகத்தார் தமிழைச்செம் மொழிதான் என்று
பலமாக ஒப்பிடுவர் ; ஆனால் நாமோ
பச்சடிபோல் தமிழ்மொழியை ஊறு காய்போல்
சிலசமயம் பயன்படுத்திக் கொண்டால் என்றோ
செம்மொழியாய் உலகில்தமிழ் செழிக்கும் ? சொல்வீர் !
*பாதாசன்*
