நமது நாட்டின் முதல் துணை பிரதமரும் உள்துறை அமைச்சரும் இரும்பு மனிதருமான சர்தார் வல்லபாய் பட்டேலின் பிறந்த தினத்தை முன்னிட்டு நாடு முழுவதும் ஒற்றுமை ஓட்டம் நடைபெற்றது.
இதனையொட்டி தருமபுரி மத்திய மக்கள் தொடர்பு கள அலுவலகம் மற்றும் அரசு மேல் நிலைப்பள்ளி நல்லம்பள்ளி சார்பாக தேச ஒற்றுமைக்கான ஓட்டம் நடைபெற்றது.
அரசு மேல்நிலைப் பள்ளியில் தொடங்கிய இந்த ஓட்டம் நகரின் பல்வேறு பகுதிகள் வழியாக சென்று இறுதியாக பள்ளி மைதானம் வந்தடைந்தது. இதில் அரசு மேல்நிலைப் பள்ளி மாணவ மாணவிகள் திரளாக கலந்து கொண்டனர். இந்த விழிப்புணர்வு ஓட்டத்தை தர்மபுரி மாவட்ட விளையாட்டு அலுவலர் திருமதி டி. சாந்தி கொடியசைத்து துவக்கி வைத்தார்.
வட்டாட்சியர் கே.ஆறுமுகம், அகில இந்திய வானொலி நிகழ்ச்சி தலைமை பொறுப்பாளர் பூ. சின்னசாமி, கள விளம்பர அலுவலர் பிபின் எஸ். நாத், தலைமை ஆசிரியர் இ.பி.தங்கவேல் உள்ளிட்டோர் இந்த விழிப்புணர்வு நிகழ்ச்சிகளில் பங்கேற்றனர்.
இறுதியாக தேச ஒற்றுமைக்கான உறுதிமொழி மற்றும் தூய்மை பாரதத்தின் உறுதிமொழி ஏற்கப்பட்டது. இந்நிகழ்வின் தொடர்ச்சியாக பள்ளி வளாகம் மற்றும் பிற பகுதிகளில் தூய்மைப் பணிகள் நடைபெற்றன.
