*நெகிரியிலே* உள்ளதமிழ்ப் பள்ளிகளுள்
*பதின்மூன்று* நிலைப்ப தற்கே
எகிறியெகிறி முயன்றாலும் எள்ளளவும்
வழியில்லை ; ஏனென் றாலோ,
பகிருதற்கோ, பகர்வதற்கோ கூசுதையோ ;
மாணவர்கள் படிப்ப தற்கே
வகிடெடுத்த வாக்கைப்போல் வரிசையிலோ
தனிப்பட்டோ வராத தாலே !
*பதின்மூன்று* தமிழ்ப்பள்ளி ஆயுளதும்
நீடிக்கப் பள்ளி சுற்றி
வதிகின்ற இந்தியர்கள் அவர்களுளும்
தமிழர்களே, வரிந்து கட்டிக்
குதிக்காதீர் ; பொறுமையுடன் *எழுவயதுப்*
பிள்ளைகளைக் கூட்டிச் சென்று
*பதிந்திடுங்கள் தமிழ்ப்பள்ளி நிலைத்திடவே*
என்றின்று பணிவாய்ச் சொன்னேன் !
தமிழ்வாழத் தமிழ்ப்பள்ளி தனில்பிள்ளை
தமைச்சேர்க்கத் தாழ்மை யோடு
தமிழனவன் சொன்னாலே *தமிழா,நீ*
*கேட்பதில்லை ;* “சரிதான் போ“என்(று)
இமியளவும் வெட்கமின்றி இயம்புகிறான்
என்தமிழன் ! என்றா லும்தான்
தமிழனல்ல ; *சீனரவர் சான்கீகின்*
சொன்னதையும் *தவிர்க்கா தேடா !*
மூடுகிற நிலையிலுள்ள தமிழ்ப்பள்ளி
நெகிரியிலே மொத்த மில்லை ;
நாடுமுழு தும்சொன்னால் *முந்நூற்றைத்*
*தாண்டுமென்றே* நவில்கின் றார்கள் !
*ஏடு,முதல் தமிழேடாய்* இந்தியர்தம்
பிள்ளைகளும் எடுத்தே விட்டால்
பீடுபெறும் தமிழ்மொழியும் ; பள்ளிக்கும்
*பேருபெத்த பேரும் சேரும் !*
மாணவர்கள் குறைவதனால் மூடுகிற
படியிருக்கும் வண்ணப் பள்ளி
ஆனவற்றின் *மேலாளர் வாரியங்கள்*
எத்தனையோ அனைத்தும் கூடி
மாணவரை *அதிகரிக்க ; அல்லவெனில்*
*பள்ளியிடம் மாற்றம் காண*
ஆனமட்டும் பாடுபட்டுப் பள்ளிகளை
வாழவைப்பீர் ; *அதுவே தேவை !*
*பாதாசன்*
