அன்றொருநாள் *தமிழ்நேசன்* ஞாயிற்றுப் பதிப்பில்
அழகாக வெளிவந்த சிறுகதைகள் ஒன்றுக்(கு)
என்றுமிலா அதிசயமாய்ப் படம்வரைந்த பெருமை
இன்றுள்ள பாதாசன் என்பவனுக் குண்டே !
அன்றுவந்த படத்தோடு சிறுகதையை எழுதி
அசத்தியவர் இன்றைய *பீர் முகமதுவே ;* அந்தத்
தொன்றுமிக்க வரலாற்றை இன்றுநினைத் தேன் ; நான்
தொடரவிலை படவரைவை ; *சை.பீரோ* தொடர்ந்தார் !
ஓவியத்தை நான்தொடர விலையெனினும் அந்நாள்
உள்ளத்தின் உணர்ச்சிகளைக் கவிமூலம் தொடர்ந்தேன் !
பாவியத்தை நான்தொட்டேன் ; *சை.பீரோ* தொடர்ந்து
பலபுதுமைச் சிறுகதைகள் எழுதிஇந்த மண்ணில்
தூவிவிட்ட விதைகளினால் விளைந்தசில எழுத்துத்
துளிர்களெலாம் எழுத்தாளர் ஆகிடவே செய்தார் !
ஆவிஎழுத் தையெழுதும் எழுத்தாள ருள்ளே
*அசல்தங்கம், முத்து,வைரம்* அவர்படைப்பே , உண்மை !
ஆவலுடன் எதற்காக இவற்றையெலாம் சொன்னேன் ?
அவர், *பதினோ ராம்உலகத் தமிழாய்மா நாட்டில்*
தாவிவந்து அணைக்கின்ற *தமிழ்ச்சேயாய்ப்* பரிசு
தமைவந்து தழுவியதே *நோபல்பரி சைப்போல் !*
கூவிஇதைத் தமிழ்கூறும் உலகமெலாம் முரசு
கொட்டுங்கள் சை.பீரின் சிறப்பிதனைப் பாடி !
ஏவுகிறேன் ஈங்குள்ள கவிஞரெலாம் கூடி
எழுதுங்கள் மலையளவு கவிதைளை என்றே !
தமிழகத்தில் மட்டுமல்ல ; தமிழ்கூறும் உலகத்
தமிழர்களின் உறவைஎங்கும் வளர்த்துவரும் தூதர் !
தமிழகத்தார் பலர்,பரிசு – பாராட்டைத் தந்தே
தாலாட்டும் மலேசியத்தின் எழுத்தார் இவரே !
தமிழ்தந்த பேச்சாளர், நெடுங்கதைகள், மேலும்
தனிக்கட்டு ரைகளுடன் *பெண்குதிரை* ஏறிச்
தமிழுலகைச் சுற்றியவர் என் *என்பால்ய நண்பர் !*
தமிழ்மங்கை சூடியுள்ள *தனிரோஜா ; உம்ம !*
*பாதாசன்*
