இளமைக்.கால ஆட்சியிலே
இருந்த போது மகாதீர்க்கே
உளத்துள் நிலைத்த மலேசியரின்
ஒற்று மையை முதுவயதில்
களத்துப் பூவாய் அழிக்க; என்ன
காரணம் ? அண்மைத் தேர்தலிலே
வளர்த்த கடாவே பாய்ந்ததுபோல்
மக்கள் தந்த தோல்வியதா ?!
தோல்வி பொறுக்க முடியாமல்
சொல்ல ஒன்றும் தோன்றாமல்
நால்விதம் சிந்தனை செய்யாமல்
ஞாய மின்றி இந்தியரை,
ஆள்வினை கொண்ட சீனர்களை
*அண்டி வந்த வந்தேறி*
கேளீர் உண்மை இதுவென்றே
கிளர்ச்சி மகாதீர் செய்வதுமேன் !?
நாட்டை உயர்த்த சீனர்களை,
நன்றாய் உழைக்கும் இந்தியரை
காட்டை அழிக்கப் பிழிந்தெடுத்துக்
கறிவேப் பிலைபோல் எறிந்து ; பணிச்
சீட்டைக் கிழித்துத் தெருவினிலே
திட்ட மிட்டே விட்டவர்கள்
வீட்டை விட்டே *போ* எனல்போல்
நாட்டை விட்டே துரத்துதல்ஏன் !?
தமிழே இங்கு வேண்டாமாம் !
தமிழும் சீனமும் வேண்டாவாம் !
உமிழ்நீ ராக இரண்டினையும்
உமிழத் துடிக்கும் மகாதீர்க்கே
உமிழ்நீர் சளிநீர் ஆகிவிடில்
உடலுக்(கு) ஆகாப் பலதொல்லை
செமையாய்க் கொடுத்தே தீருமென்று
தெரியா தா ? ஒரு டாக்டருக்கே !
அரசின் சட்டம் வகுத்திட்ட
அந்நாள் சட்ட வல்லுநர்கள்
அருமை மக்கள் தேவைகளை
அறிந்தே சட்டம் வரைந்தளித்தார் !
அரசல் புரசல் இல்லாமல்
அதிகா ரத்துடன் தமிழ் ,சீனம்
முறையாய்ப் பயில வாய்ப்பளித்தும்
மூடர் போல மறுப்பதுமேன் ?
ஈரம் பட்ட தீப்பெட்டி
இந்தியர் ; சீனர் என்றெண்ணி
ஈரம் இல்லா நெஞ்சுடனே
இன்று வெறுத்தல் தேவையதா ?
ஈரம் கண்ட தீப்பெட்டி
எரிக்கும் வெயிலில் காய்ந்துபின்பு
காரம் போகாக் கருமிளகாய்க்
காட்டா தா,தன் காரத்தை ?
எதிலும் ஒன்று கூடாத
இந்திய , சீன மாந்தர்களே ,
புதிய தொற்றாம் இனவாதப்
புற்று நோயாம் வனத்தீயை
அதிவே கத்தில் அணைத்திடவே
அனைவரும் ஒற்றுமைக் கடல்நீரைக்
கதியாய்க் கொணரச் செய்திடவே
*காலம் இதனைக் கடத்தாதீர் !*
*பாதாசன்*
*அரும்பொருள் விளக்கம் :-*
கதியாய் : விரைவாய்
