அன்றிருந்த அரசியலே இங்றே வேறாம் !
அன்பார்ந்த இந்தியரே சற்றே கேளீர் !
இன்றிருக்கும் அரசியலோ முற்றாய் வேறாம் !
இந்நிலையை எண்ணாமல் *சிதறு தேங்காய்*
*மென்றுசுவைப் பதைப்போலச்* சமுதா யத்தை
மெல்கின்றீர் சிறுகட்சி பலவும் செய்தே !
என்றென்றும் இதனாலே இங்கே நாமும்
எப்போதும் ஏற்றமுற மாட்டோம் ; உண்மை !
கூட்டாக இருந்துவந்த *எருமை நான்கைக்*
கொன்றுதின்ன முடியாமல் *சிங்கம்* அன்று
கூட்டாளி நரிசொன்ன தந்தி ரத்தால்
கூட்டான நான்கெருமை பிரிந்த பின்னே
வேட்டையினைச் சிங்கமதும் எளிதாய்ச் செய்து
விரைவாக எருமைகளை ஒவ்வொன் றாகக்
காட்டமுடன் கொன்றுதின்ற கதையைத் தானே
காட்சிகளாய் இந்தியர்க்குள் காணு கின்றோம் !
இக்காட்சிக் குள்ளிருக்கும் சிங்கம் யாரோ ?
இழிவுநரி யார் ? என்றே ஆய்தல் விட்டே
இக்காட்சிக் குள்மாய்ந்த எருமை போன்றோர்
எவரென்றே ஆராயின் ஐயோ ! ஐயோ
திக்கற்ற இந்தியரே தெரிகின் றாரே !
சிந்திக்கத் தவறியதால் இந்தி யர்கள்
எக்கட்சிக் குள்ளேனும் இணைந்தே தங்கட்(கு)
இருந்தபலம் அனைத்தையுமே இழந்தே விட்டார் !
உடைந்த *நிலைக் கண்ணாடி* யாகி இன்றே
ஒருபயனும் தாராத பொருளாய் ஆனார் !
அடைந்தஇந்த அவலத்தால் யாரின் மீதும்
அவசரத்தில் குற்றத்தைச் சுமத்தல் குற்றம் !
நடைமுறையில் ஒருவர்க்கே ஆகும் தீதும்
நன்றும்தான் பிறராலே சேர்வ தல்ல ;
திடமாக *அவர்க்(கு)அவரால்* சேரும் என்று
தெளிந்துரைத்த *பூங்குன்றன்* சொல்ம றந்தோம் !
*ஒருகட்சி ; தாய்க்கட்சி* யாக இன்றும்
உலவுகிற *ம . இ . கா .* இந்தி யர்க்கே
*பெருங்கட்சி* யாய்இருந்த காலத் தில்நாம்
பெரியதொரு *கூட்டணியில்* இருந்தோம், அன்று
சிறுகட்சி யானாலும் *ம . இ . கா.வை*
சிறப்பாகக் *கூட்டணியார்* மதித்த தாலே
சிறுபான்மை இந்தியர்க்கும் *முழு–அ மைச்சர்*
செழிப்பளித்தார் ஏனாம் ? *நம் ஒற்று மைக்காய் !*
*கொசுவுக்கும் மூட்டைப்பூச் சிக்கும்* அஞ்சிக்
கொளுத்திவிட்டார் வீட்டை,எனும் கதையைப் போலக்
கொசுபோன்ற சிறுபூசல் வந்த தற்காய்
ம . இ . கா . *கோட்டையையே* சரித்தே விட்டார் !
கொசுவினையே கொல்வதற்கு மருந்தும் உண்டே ;
குணங்கெட்டே அதைமறந்து *ம .இ . கா* . வை
நசுக்கிடவே பிறரோடு கூட்டுச் சேர்ந்தார் ;
நமக்கின்று *முழு – அமைச்சர்* பதவி இல்லை !
*பிடிக்கவிலை ம . இ . கா* என்றால் அன்னார்
பிறிதொன்றாய் *வலுமிக்க கட்சி* தன்னைக்
கடிதாக அமைக்காமல் *குறைந்த பேரால்*
*கட்சிகளைப் பலவாக* அமைத்தார் ! எந்தப்
பிடிமானம் இன்றிப் *பல் லினத்தார் கட்சிப்*
பிடியினிலே சிக்கி–அவர் *தனித்தன் மையை*
உடனிழந்தார்; பின்விளைவைச் சிந்திக் காமல்
*உட்கார்ந்தார் தலையிலின்று கையை வைத்தே !*
போனதெலாம் போகட்டும் ; இனிமே லேனும்
புத்துயிரைப் பெற்றதுபோல் இந்தி யர்கள்
ஆனமட்டும் *ஒன்றிணைந்து பெரிய கட்சி*
அமைக்கட்டும் ! அல்லவெனில் *ம . இ . கா .* வில்
தானிணைந்தால் தான்நமக்கே இந்த நாட்டில்
சரியான – உரித்தான *இடமே கிட்டும் !*
ஆணையிட்டே இந்தியர்கள் ஒற்று மையை
அனுசரித்தே வாழ்ந்தால்தான் நமக்கு வாழ்வு !
பல்லினம்சார் கட்சியிலே இந்தி யர்கள்
*பங்கெடுத்தல்* தப்பல்ல ! ஆனால் எந்தப்
பல்லினத்துக் கட்சியிலும் பெரும்பான் மையாய்ப்
பங்கெடுத்தே உள்ளோமா ? இதுதான் கேள்வி !
பல்லினத்துக் கட்சிக்குள் *எள்ளைப்* போன்றே
*பல்குத்தும் குச்சிகளின் பயனாய் உள்ளார் !*
நல்லதுவா ? இதுநமக்கென்(று) ஆங்கே சேர்ந்த
*நம்மவரே ; இந்தியரே சிந்திப் பீரே !*
*பாதாசன்*
