“இந்நாட்டில் பிறயினத்தார் *பிரதமராய்* ஆக
எப்போதும் *மலாய்க்காரர் ஆதரவு* வேண்டும்“
முன்னாளில் பிரதமராய் இருமுறைகள் இருந்த
மூத்தவராம் *துன்டாக்டர் மகாதீர்* சொல் கின்றார் !
எந்நோக்கில் இன்றவரும் ஈங்கிதனைப் பகிர்ந்தார் ?
என்பதிலே *உட்கிடக்கை ஏராளம்* உண்டாம் !
அந்நோக்கில் மலாய்க்காரர் மட்டும்தான் இங்கே
ஆயுளுக்கும் பிரதமராம் என்பதையே கண்டோம் !
இங்குள்ள *பூமிபுத்ரா* தனிச்சலுகை யையும்
என்றென்றும் பிரதமர்கள் அவர்களென்ப தையும்
இங்குள்ள பிறயினத்தார் எப்போதும் ஏற்பர் !
இந்நிலையில் பிரதமராய் வரவேண்டும் என்றே
தங்களுக்குள் பிறயினத்தார்க்(கு) எண்ணமதே இல்லை ;
சட்டமதற்(கு) இடம்தந்த போதினிலும் அன்னார்
இங்கிதமாய் நினைப்பதுவே இல்லையெனும் போதில்
எதற்காக மகாதீர்க்கு வேண்டாத பேச்சு ?
பெரும்பான்மை ஆங்கிலத்தார் பிரிட்டனிலே எனினும்
சிறுபான்மை இந்தியருள் பிரதமராய் ஒருவர்
இருப்பதுபோல் இங்கிருக்க வேண்டுமெனும் எண்ணம்
இங்கில்லை என்பதுவும் எல்லார்க்கும் தெரியும் !
அருகிருக்கும் சிங்கையிலே பெரும்பாலோர் சீனர்
ஆதலினால் அந்நாட்டுப் பிரதமரும் அவரே !
தெரியும்,அதும் ஆனாலும் அந்நாட்டின் அதிபர்
தெரியலையோ மகாதீருக்(கு) அவர்தமிழர் என்றே !
இந்தியர்க்கோ சீனர்க்கோ மேல்பதவி வேண்டாம் !
எந்நாளும் அவர்களிங்கு *கேட்பதென்ன ?*, தத்தம்
சந்ததியர் குடியுரிமை பெற்றிருந்தும் கூட
சந்ததமும் நல்வாழ்வைப் பெறாதபடி குமுறும்
அந்தநிலை ; அவலநிலை ஒழிந்திட்டால் போதும்
அதைத்தானே கேட்கின்றார் அதைக்கூட *இங்கே*
*வந்தேறி* எனக்கூறி மறுப்பதனை நிறுத்தி
வசதியுடன் வாழவிட்டால் போதும்–ஐயா சாமி !
*பாதாசன்*
