பாரதியார் எப்படித்தான் இருந்தி ருப்பார் ?
பலநாளாய் இளவயதில் யோசித் துள்ளேன் !
பாரதியார் இப்படித்தான் ; என்றே அன்று
படத்தில்தான் நடிகர் *சுப் பையா* காட்டி
வீரமிக்க பேச்சதுவும் கவியும் சேர்ந்த
விவேகமிகு பாரதியை உணர வைத்தார் !
ஈரமிக்க நெஞ்சுடையார் *அவரும்* என்றே
எடுத்துரைக்கப் பாரதிபாட்(டு) அதிகம் உண்டாம் !
*தமிழவேள் சாரங்க பாணி* அந்நாள்
*தமிழர்திரு நாள்* கண்ட காலத் தில்தான்
தமிழ்க்கவிஞர் *பாரதி,பா ரதிதா சன்* யார் ?
தமிழ்மொழியின் *சிறப்பென்ன ?* வானு யர்ந்த
*தமிழர்வர லாறென்ன ?* என்ப வற்றைச்
சரியாக ஓரளவுக்(கு) உய்த்து ணர்ந்தேன் !
*அமிழ்தருந்தி* மகிழ்ந்திருந்த அந்த நாளை
அடியேனும் இன்றுணர்ந்தேன் ; எதற்காம் ? சொல்வேன் !
இந்நாட்டில் *பாரதியார் தமிழ்மன் றத்தார்*
ஈங்குள்ள *முத்தமிழ்ச்சான் றோரைக்* கண்டே
எந்நாடும் அவர்தொண்டு , புகழை எல்லாம்
இருநூலில் பதிவிட்டே வழங்கி யுள்ளார் ;
பன்முறையும் படித்தாலும் சலிக்கா வண்ணம் !
பலரிதனை அறிந்துள்ளார் ! என்றா லுந்தான்
இந்நாட்டில் *பாரதியை இளையோர் பல்லோர்*
இதயத்தால் உணர்ந்திடவே செய்தார் இந்நாள் !
*தமிழ்ப்பள்ளி மாணவர்கள், பல்க லைசேர்*
தமிழினத்தின் *இளம்பட்ட தாரி* சில்லோர்
அமைவாக ஒன்றிணைந்தே அருமை யாக
அறிந்தேநம் பாரதியைப் போற்றச் செய்தார் ;
நமக்கெல்லாம் நேரடியாய்ப் பார்க்க வொண்ணா,
நல்லதொரு சமுதாயம் காண நாளும்
இமைமூடா திருந்துகவி எழுதிப் போந்த
*இளைஞர்பா ரதியை* நேர் பார்க்க வைத்தார் !
பட்டிதொட்டி களிலெல்லாம் அக்கா லத்தில்
*பட்டிமன்றம்* நடந்ததெலாம் கனவா ? என்றே
அட்டியின்றி நிதம்வருந்திக் கிடந்த துண்மை !
அப்படியா ! ஏன்கவலை ; திவலை கண்ணில் ?
*பட்டிமன்றம் இதோ !* என்றே காட்டி நெஞ்சில்
பல்கலையின் மாணவர்கள் பால்வார்த் திட்டார் !
தட்டிக்கை ஒலியெழுப்பிப் பாராட் டைத்தான்
*தமிழ்மன்றப் பாரதிக்கு* மகிழ்வாய்ச் சொன்னோம் !
*பாதாசன்*
