தமிழ்ப்பள்ளி யில்படித்த முன்னாள்மா ணவர்கள்
பினாங்குநகர் தைப்பூச விழாவினிலே கூடித்
*தமிழ்ப்பள்ளி யேநமது முதல்தேர்வே* என்னும்
தக்கதொரு *பரப்புரையை* மேற்கொண்ட சேதி
தமிழ்ப்பள்ளி மாணவர்கள் *எண்ணிக்கை* உயரச்
சத்தியமாய் வழிவகுக்கும் எதிர்கா லத்தில் !
நமக்கின்று புதியதொரு நம்பிக்கை தந்த
நம்முன்னாள் தமிழ்ப்பள்ளி மாணவர்கள் வாழ்க !
இவர்களைப்போல் நாட்டிலுள்ள தமிழ்ப்பள்ளி களிலே
இருக்கின்ற நம்முன்னாள் மாணவர்கள் சேர்ந்தே
அவரவர்,தாம் முன்படித்த தமிழ்ப்பள்ளிக் காக
ஆண்டுதொறும் புதுப்புதிய மாணவர்கள் சேரத்
தவறாமல் மறவாமல் பரப்புரையைத் தொடர்ந்தால்
தமிழ்ப்பள்ளி மாணவர்கள் குறைவாரா ; மாட்டார் !
அவசரமாய் மட்டுமல்ல மாணவர்காள் கேளீர் ;
அவசியமாய்ப் பரப்புரையைச் செய்வீரே ,சரியாய் !
முன்னாளில் *இராசரத்னம்* பேர்கொண்ட நண்பர்
முன்னாளின் தமிழ்ப்பள்ளி மாணவர்கள் சங்க
முன்னோடி யாயிருந்து நாடளவில் செய்த
முக்கியநற் பணிகளையும் இன்றெண்ணிப் பார்த்தே
இந்நாளின் தமிழ்ப்பள்ளி மாணவர்கள் அமைப்பு
எழுச்சியுடன் மாணவர்கள் எண்ணிக்கை உயர
பன்னாளும் பரப்புரையை அரும்பணியாய்க் கொண்டே
பரபரப்பாய் விறுவிறுப்பாய் செயலினையே செய்வீர் !
தமிழ்சார்ந்த எந்தவொரு பொதுநிகழ்வில் இன்று
தமிழர்களின் பங்கேற்பு நிறைவுடனே இல்லை !
தமிழ்ப்பள்ளி மாணவர்கள் குறைவதுதான் இதற்குத்
தக்கதொரு காரணமாய் இருப்பதுவும் உண்மை !
*தமிழ்வாழ்வு, தமிழ்க்கலைகள், தமிழ்ப்பண்பா டோடு*
*தமிழ்ப்பற்று, தமிழர்களின் ஒற்றுமை* ஓங் கிடவே
தமிழ்ப்பள்ளி முன்னாளின் மாணவர்கள் என்றும்
*தமிழ்ப்பள்ளி முதல்தேர்வு* பரப்புரையைத் தொடர்க !
*பாதாசன்*
