உலகம் முழுவதும் பண்பாடு, கலாச்சாரம் ஆகியவற்றில் தொன்மையான பகுதிகளை பார்வையிடுவதில் சுற்றுலா பயணிகள் அதிக ஆர்வம் காட்டி வருகின்றனர். இந்தியாவிலேயே தமிழ்நாடு, வெளிநாட்டு மற்றும் உள்நாட்டு சுற்றுலா பயணிகளை கவர்வதில் முதலிடம் வகித்து வருகின்றது. சுற்றுலா பயணிகளுக்கு தேவையான சாலை போக்குவரத்து, இரயில் போக்குவரத்து, விமானம் போக்குவரத்துஉள்ளிட்ட அடிப்படை கட்டமைப்பு வசதிகள் தமிழ்நாட்டில் முழுமையாக உள்ளன.
தமிழ்நாடு, உலகின் பழம்பெருமைகள் கொண்ட கலாச்சாரம் மற்றும் பண்பாடுகளின் தாயகமாக விளங்குகிறது. கலாச்சார பெருமை, வரலாற்று பெருமை மற்றும் பண்பாட்டு பெருமைகளை கொண்ட பல்வேறு நினைவுச்சின்னங்களும், தொல்லியல் பெருமைவாய்ந்த இடங்களும் தமிழகத்தில் ஏராளமாக உள்ளன. தமிழ்நாட்டின் மாமல்லபுரம் கடற்கரைக் கோயில், ரதங்கள் மற்றும் சிற்பங்கள், தஞ்சை பெரிய கோயில், தாராசுரம் ஐராவதீஸ்வரர் கோயில், கங்கை கொண்ட சோழபுரம், நீலகிரி பாரம்பரிய மலை ரயில், மற்றும் மேற்கு தொடர்ச்சி மலை, ஆகியவற்றை யுனெஸ்கோ அமைப்பு உலக பாரம்பரிய நினைவுச் சின்னங்களாக அறிவித்துள்ளது.
முதலமைச்சர் மு.க.ஸ்டாலின் 300 சுற்றுலாத் தலங்களை சர்வதேச தரத்தில் பல்வேறு வசதிகளை செய்திட ஆணையிட்டுள்ளார்கள். சர்வதேச சுற்றுலாத்தலமாக வளர்ச்சிப் பெற்றுள்ள மாமல்லபுரம், 7-ஆம் நூற்றாண்டில் பல்லவர் கால முக்கிய துறைமுகமாக விளங்கிய நகரமாகும். மாமன்னன் மகேந்திர வர்ம பல்லவன் படைத்தளித்த மாமல்லபுரம் கலைச் செல்வங்கள் பல நூறு ஆண்டுகள் கடந்தும், உயிர்ப்புடன் அழகு மிளிர மணற் பரப்பில் எழுந்து நிற்கும் வரலாற்று மகத்துவமாகும். மாமல்லபுரம் கட்டிடக் கலையின் அருங்காட்சியகமாக திகழ்கிறது. இங்கு வங்கக் கடலோரத்தில் ஒரு கற்கோயில், திறந்த வெளிச் சிற்பம், குடை வரைக் கோயில், ஒற்றைக் கல் சிற்பங்கள் ஒரே இடத்தில் காணகிடைக்கும் அற்புதமாகும். இதன் காரணமாக இந்தியாவில் அதிகளவில் வெளிநாட்டு பயணிகள் வருகை தரும் இடமாக மாமல்லபுரம் விளங்கி வருகிறது. சுற்றுலா பயணிகளின் வருகையினை அதிகரிக்கவும், அவர்கள் தமிழ்நாட்டில் நீண்டநாட்கள் தங்கி சுற்றுலா தலங்களை பார்வையிடவும் மாமல்லபுரம் நாட்டிய விழா 1992ஆம் ஆண்டில் அறிமுகப்படுத்தப்பட்டு, பிறகு இந்திய நாட்டிய விழாவாக நடத்தப்பட்டு வருகிறது. இவ்வாண்டு(2024) இந்திய நாட்டிய விழா மாமல்லபுரம் கடற்கரை கோயில் வளாகத்தில் 22.12.2024-ல் தொடங்கி 20.01.2025 வரை நடைபெற உள்ளது.
இந்திய நாட்டிய விழாவில் இந்திய நாட்டியங்களில் சிறப்பான பரதநாட்டியம், மோகினியாட்டம், கூடியாட்டம், ஒடிசி, கதக்களி, குச்சிப்புடி மற்றும் கிராமிய கலைகளான கரகம், காவடி, தப்பாட்டம், ஒயிலாட்டம், போன்ற 70க்கும் மேற்பட்ட குழுக்களின் கண்கவர் கலை நிகழ்ச்சிகள் நடத்தப்பட உள்ளன. சுற்றுலாப் பயணிகள் குறிப்பாக வெளிநாட்டு சுற்றுலாப் பயணிகள் இந்த நாட்டிய விழாவினை ஒவ்வொரு ஆண்டும் தொடர்ந்து வருகை தந்துகண்டுகளித்து வருகின்றனர். இந்திய நாட்டியவிழா நிகழ்ச்சிகள் முழுவதும் தமிழ்நாடு சுற்றுலாத்துறையின் சமூக வலை தளங்களின் மூலம் நிகழ்ச்சிகள் நடைபெறும் சமகாலத்திலேயே (LIVE) கண்டு களிக்க ஏற்பாடுகள் செய்யப்பட்டுள்ளன.
இந்த நிகழ்வின் போது சட்டமன்ற உறுப்பினர்கள், சுற்றுலா, பண்பாடு, அறநிலையங்கள் துறை அரசு முதன்மை செயலாளர் மற்றும் தலைவர் தமிழ்நாடு சுற்றுலா வளர்ச்சிக் கழகம் டாக்டர்.சந்தரமோகன் B இ.ஆ.ப., சுற்றுலா இயக்குநர்/ தமிழ்நாடு சுற்றுலா வளர்ச்சிக் கழக மேலாண்மை இயக்குநர் ஷில்பா பிரபாகர் சதீஷ் இ.ஆ.ப, செங்கல்பட்டு மாவட்ட ஆட்சித் தலைவர் ச.அருண்ராஜ், இ.ஆ.ப., மாவட்ட வருவாய்த் துறை அலுவலர், ஊராட்ச்சிப் பிரதிநிதிகள், நடன கலைஞர்கள், பொது மக்கள் சுற்றுலா பயணிகள் மற்றும் அரசு அலுவலர்கள் கலந்து கொண்டனர்.
